Gin “raid” sang mga kapulisan ang opisina sang gin alegar “illegal online lending agency” sa Sampaloc, Manila.
Sa nasambit nga raid, gin aresto ang 83 ka mga persona nga nagapadala sang mensahe kag pagpamahog sa mga kliyente nga mapaslawan sa pagbayad sang ila utang sa gintalana nga petsa.
Suno kay Police Brig. Gen. Joel Doria, director sang PNP-Anti-Cybercrime Group (ACG), nadakpan sa aktu ang mga empleyado nga nagapadala sang mensahe sa mga customers.
Aktu man nga nadakpan ang iban pa, nga iligal nga nagakuha sang impormasyon sa ila kliyente kag gina “post” sa social media, kalakip ang mga “libelous” nga mga mensahe.
Madamu na sang nagareklamo nga mga kliyente sa modus sang kompanya, rason kon nga a ginpatigayon sang mga otoridad ang “raid”.
Kalakip sa modus sang kompanya, amo ang pag engganyo sa mga pumuluyo nga mag apply sa loan, nga mas madasig ang proseso okon quick loan.
Apang sa ti-on nga ma “delay” ang pagbayad sa utang, magapadala naman ang kompanya sang mga mensahe kag pakahuy-an ang mga kliyente sa social media.
Bangud sang pagdagsa sang reklamo batuk sa mga “quick loans”, ginpabaskog pa sang mga otoridad ang pag monitor sa mga “online lending agencies” nga may kaangay sini nga modus.
Ginapreparar na sang PNP-ACG ang kaso batuk sa mga nagkaladakpan.*
