Natalana nga magpasar sang ordinansa si Councilor Renecito Novero, chairman sang Quarantine Centers Action Team sa siudad sang Bacolod nga magahatag sang emergency power kay Mayor Bing Leonardia agud nga masolusyunan ang padayon nga pagtaas sang mga nagapositibo sa COVID-19 sa siudad.
Sa interview sang Radyo Bandera kay Councilor Novero, ginsiling sini nga naghingyo ang grupo sang mga medical practiotioners sa Bacolod City kay Mayor Bing nga ibalik ang siudad sa Modified Enhanced Community Quarantine (MECQ) sang duha ka semana agud nga mahaga-hagan ang pagtaas sang kaso sang nasambit nga balatian.
Suno kay Novero, luyag gid sang siudad nga suportahan ang hingyo sang mga medical practitioners apang kulang ang mga ini sang legal basis nga mapatuman ang nasambit nga tikang rason nga nagdihon ini sang ordinansa nga magahatag sang emergency power kay Mayor Bing sa tion sang pandemya.
Nagalaum naman si Novero nga suportaha-n sang Sanggunian ang ordinansa sini kag kuntani mahangpan man sang mga pumuluyo.
Tinutuyo sang nasambit nga ordinansa nga ma-limit ang giho sang mga pumuluyo kag mapahagan-hagan man ang pagtaas sang mga nagapositibo sa virus.
Mangin epektibo naman ini sa gilayon kun maaprubahan na sa ila patigayunon nga sesyon.
Nahibaluan nga naghatag sang alarma sa mga medical practioners ang padayon nga pagtaas sang COVID-19 sa siudad kag nadiskubrehan man sang pila ka opisyal sang Bacolod nga tatlo na lamang ka doktor ang nagapatigayon sang rounds sa mga ospital bangud pila sa mga kaupdanan sang mga ini ang nagpahuway kag ang iban ang nagresign na sa trabaho.
