BACOLOD CITY– Natapos na ang kontrata sang Micro Asia Builders sini nga bulan sang Marso may angut sa konstruksyon sang access road pakadto sa Sanitary Landfill sa Barangay Felisa, siudad sang Bacolod.
Madumduman nga nagsugod ang pagtrabaho sang Micro Asia Builders sadtong Nobyembre 18, 2022 sa pondo nga P12 milyones sa inisyal nga pagpakay-o sang dalan ang ginalauman base sa kontrata nga matapos sa sulod sang 180 ka diyas.
Walo ka metros ang kalapadon sang dalan nga nagalaba sang 1.2 ka kilometro nagikan sa Felisa Barangay Hall, anum ka metros ang maagyan sang salakyan nga pagasementuhon samtang ang nabilin nga duha ka metros ang igatalana para sa shouldering.
Sa interview sang Radyo Bandera kay Engineer Efraem Hechanova, Assistant City Engineer sang Bacolod, natapos na ang kontrata sang Micro Asia Builders, kag nahuman sini ang mga parte sang dalan nga masami gina problema sang IPM-CDC nga gaka-guot ang ila garbage truck kun mag-ulan.
Suno kay Engr. Hechanova, pagkatapos sang Micro Asia Builders, sunod naman ang pagkumpleto sang dalan kaupod na ang pagbutang sang Box Culvert, Drainage System kag Solar Streetlights nga pagapondohan sang P30 milyones sa P5.5 bilyones nga loan sang siudad.*
