BACOLOD CITY – Ginpahayag ni Negros Occidental Provincial Tourism Officer Cheryl Decena nga ginalauman ang pagdagsa sang mga turista sa probinsya sini nga tuig bangud sa mga aktibidades nga ginahimo agud mabuhi ang turismo sang probinsya.
Nalakip sa nasambit nga mga aktibidades ang Lakbayanihan nga ginlunsar sang tinalikdan nga Mayo kag paghatag sang akreditasyon sa nagkalain-lain nga mga establisyemento sa probinsya.
Suno kay Decena, nagsaka na sa 43 ka porsyento ang mga establisyemento sa probinsya nga accredited sang Department of Tourism (DOT) humalin sa 143,203.
Sandig sa datus nga ginpresentar ni Decena, nagdangat na sa 127,000 ka overnight tourists ang nagbisita sa probinsya humalin sang Enero tubtob sini nga Hulyo 15.
Suno kay Decena, ini nga datus ang naghalin pa lamang sa 12 ka Local Government Units (LGUs) rason kun ngaa mahimo pa nga magasaka ini.
Sa kasubong nga datus, 127,040 ang domestic overnight tourists, 454 ka mga foreign overnight, kag 33 pa ka dugang nga mga indibidwal.
Samtang may 445,118 naman ka mga bisita nga wala na nagtiner overnight.
Dugang pa ni Decena, mas mabatyagan pa gid ang pagdamo sang mga turista bangud sa paghalog sang restrictions kag pagbukas sang borders.
Nagapangabay naman si Decena nga indi sa gihapon pagkalipatan ang safety protocols bangud sa presensya sang COVID-19.
– by Kabanderang Randy Coronel
