BACOLOD CITY– Nagpatigayon na sang una nga pagsinapol ang Technical Working Group (TWG) sang Bulk Water Project sang probinsya kahapon, Huwebes, Disyembre 15, 2022.
Ang nasambit nga pagsinapol ang gintambungan nanday Provincial Administrator Atty. Rayfrando Diaz II, mga tiglawas sang USAID kag Public – Private Partnership Center Consultants nga ginhiwat sa Negros Residences sa siudad sang Bacolod.
Suno kay Atty. Diaz ini ang una nga tikang para sa katumanan sa isa ka dako nga proyekto sang probinsya sa idalum sa pagpamuno ni Governor Eugenio Jose Lacson.
Dugang pa ni Diaz, kalakip sang ila gin-istoryahan amo ang pagpatigayon sang “feasibility study” kag bidding para sa mga Local Government Unit (LGU) nga luyag mag-avail ukon mag subscribe sa serbisyo sang bulk water.
Ginpahayag pa ni Atty. Diaz nga magapatigayon sang training para sa core group sang PPP kag mga katapo sang Technical Working Group (TWG) sang amo nga proyekto.
Ginalauman ni Diaz nga ini ang mangin sabat sa kakulangan sang suplay sang tubig sa probinsya kag paghatag sang access sang matinlo nga tubig para sa mga pumuluyo.
Suno kay Atty. Diaz importante ang access sang matinlo nga suplay sang tubig bangud nagasaka ang kaso sang cholera kag iban pa nga water borne diseases sang probinsya.
Pahayag naman ni Atty. Diaz, yara na duha ang ginapilian nga pagakuhaan sang suplay sang tubig para sa bulk water project nga Imbang River sa siudad sang Talisay nga sarang makuhaan sang 40 milyon ka litro kada adlaw kag ang Malogo River sa siudad sang Victorias.*
