Ginawasak sang buhawi ang yara na sa 50 ka panimalay sa banwa sang Oton, Iloilo kag Iloilo City kun diin duha ka indibidwal ang nasamaran sadtong Miyerkules, Enero 3, 2023.
Sandig sa imbestigasyon, takna las 5 sang aga sang natumbahan sang puno ang balay sang mag-lola nga sanday Vilma Villarete 63-anyos kag 9-anyos nga apo sini sa Brgy. Sta. Cruz, Arevalo, Iloilo.
Suno sa report sang Arevalo Police Station, nagakatulog sadto ang mag-lola sang nag-agi ang buhawi sa ila nga lugar kag na-igo ang ila balay nga himo sa light materials.
Nagguwa sa datus sang Iloilo City Social Welfare Office nga 39 ka panimalay ang naguba bangud sa buhawi kun diin 21 sa Brgy. Sto Domingo kag 18 naman sa Brgy. Sta. Cruz.
Samtang, sa banwa sang Oton, 15 ka panimalay sa Barangay Alegre ang naguba kag pila man ka puno ang natumba bangud sa buhawi.
Gilayon naman nga ginbakwit sang mga otoridad ang mga residente padulong sa maluwas nga lugar.
Sa karun, ginahibalo pa sang mga otoridad ang kabliguan sang mga apektado nga balay kag kantidad sang naguba nga mga propriedad.*
