Patay na sang gindala sa ospital ang is aka kaupdanan sang walo tanan ka mga trabahador nga lunsay sakay sang canter nga may karga nga mga mabug-at nga materyales kon sa diin padulong kon tani ang mga ini sa ciudad sang Cebu.
Apang wala ginalauman sang hinali mahulog ang canter nga ginamaneho sang ila nga upod sa is aka pil-as nga nahamtang sa Dokog-Dokog Barangay Rizal ciudad sang San Carlos Negros Occidental.
Ginkilala ang napatay nga si Jimmy Javenes 30-anyos kag nagapuyo sa Guadalupe, Cebu City, samtang nagapabilin naman sa ospital ang iban pagid ka mga pilason nga ginkilala kay Jaime Buyan 35-anyo, Reynaldo Sotil 38-anyos, nga lunsay taga Tagbilaran City Bohol, amo man sanday Roland John Labra 29-anyos nga taga Talisay Cebu, Elesio Ancalas 55-anyos driver sang canter nga taga Guadalupe Cebu City nga padayon man nga gina-obserbahan sang mga doctor sa ospital.
Maswerte naman nga nakaluwas kag wala makaagum sang grabi nga pilas ang duh aka mga sakay sang nasambitan nga salakyan nga sanday Reymart Lambohon taga Bogo Cebu kag Godofredo Cadayday taga Bohol.
Nahibaloan nga halin pa sa Capiz ang mga trabahante matapos mag kay-o sang is aka telco tower kag nakatalana nga magabalik sa Cebu.
Sa karon nakipag-angot na ang ahensya sa JMON Construction nga amo ang ginatrabaohan sang mga biktima kon sa diin nagpromisa man ang ahensya sang bulig sa ila ilabi nagid sa pamilya sang napatay.
