Paga-imbestigahan sang Philippine National Police (PNP) Anti-Cybercrime Group (ACG) ang mga social media pages nga gina-alegar naga-offer sang madasig nga passport appointments.
Ini matapos nagrequest ang Department of Foreign Affairs (DFA) sang assistance sang PNP kag National Bureau of Investigation (NBI) agud madakpan ang mga imbolbado sa amo nga pagpang-scam.
Pahayag ni PNP chief Gen. Guillermo Eleazar, ginmanduan sila nga arestohon kag pasakaan sang kaso ang mga persona sa likod sang pagpangscam sa mga biktima nga kalabanan mga overseas Filipino workers.
Nauna na nga ginmanduan ni DFA Undersecretary Brigido Dulay ang PNP kag NBI nga kilalahon ang sa likod sang mga Facebook pages kag groups nga naga-offer sang madasig nga passport appoinment process sa mga aplikante.
Suno sa DFA, libre kag wala sang bayad ang pagkuha sang appointment slots para sa tanan nga consular services.
Nag-apelar naman ang PNP chief nga ireport sa mga otoridad ang amo nga illegal nga buluhaton sa social media.
