Suportado sang pila ka kongresista ang paghatag sang dugang nga allowance para sa internet access sang mga manunudlo sa maabot nga pagbukas sang klase.
Suno kay Camarines Sur Rep. Gabriel Bordado, ginapngayo man sang mga manunudlo sa iya nga nasakupan nga mahatagan sila sang P3,000 allowance kada bulan.
Apang suno kay Education Undersecretary Annalyn Sevilla, may ginahatag na sila nga cash allowance nga mahimo gamiton sang mga manunudlo nga pambakal sang mga suplay.
Ang nasambit nga allowance ang ginahatag bilang entitlement kag indi na kinahanglan pa nga pamatud-an sang mga manunudlo kun sa diin ini nagakadto.
Apang suno kay Sevilla kun luyag gid nga dugangan sang mga mamamalidha ang nasambit nga pondo, bukas naman ang DepEd para diri.
Dugang pa diri, ginahatagan man sang flexibility ang mga eskwelahan sa paggamit sang ila nga Maintenance and Other Operating Expenses kag kwarta nga ila nabudget para sa paghimo sang self-learning modules.