Pirmado na ni Presidente Ferdinand Marcos Jr. ang hagna nga nagaduso sa postponement sang Barangay kag SK election.
Apang, ginpaathag sang Commission on Election okon COMELEC, nga kinahanglan sa gihapon nga magpadayon ang komisyon sa preparasyon.
Suno kay COMELEC chairman George Erwin Garcia, mahimo sa gihapon nga kwestyonon sa Korte Suprema ang legalidad kag constitutionality sang laye nga ginpirmahan sang pangulo.
Matapos nga nangin laye ang ginaduso nga “postponement”, natalana nga magpagwa ang COMELEC sang bag-o nga petsa okon schedule of activities para sa election period, pagpatuman sang gun ban kag iban pa.
Nakasaad sa laye nga ginpirmahan ni pangulong Marcos Jr., nga Oktubre 30, 2023 ang bag-o nga petsa sang Barangay kag SK election.
Kasunod sini, gin anunsyo na sang COMELEC nga magapadayon ang voter’s registration, nga umpisahan sa naulihi nga semana sang Nobyembre tubtub sa naulihi nga semana sang Mayo, sa masunod nga tuig.
