Ginkumpirmar sang hepe sang Bacolod City Police Station 8 nga nagapabilin karon sa ospital si Christian “Don Don” Tulot nga amo ang prime suspect sa pagpatay sa apat sini ka mga himata sa Gardenville Subdividion, Barangay Tangub sa ciudad sang Bacolod, matapos nga gin-mild stroke sang Abril 20 sang gab-i.
Suno kay Police Major Joery Puerto, nagtaas ang dugo ni Tulot sa 180/100 kag nagtaas man ang palpitation sini rason nga ginhingagaw ini dala sa Corazon Locsin Montelibano Memorial Regional Hospital kag ginabantayan karon sang mga kapulisan.
Nahibaluan nga sang tinalikdan nga Abril 19, ginpasakaan sang kaso nga four counts of murder kag robbery si Tulot.
Ginpahayag ni Puerto nga nadugayan antes mapasaka ang kaso batok sa suspek humalin nga nag-isyu ini sang iya extrajudicial confession bangud sang Huwebes lamang nakaabot kag nakahatag sang affidavit ang malapit nga pamilya sang mga biktima.
Wala naman sila makadayon sa pag-file sang tinalikdan nga Biyernes bangud sarado ang City Prosecutors Office bangud nga nag-disinfect.
Ginakabig naman ni Puerto nga “case-closed” na ang nagluntad nga masaker sa Brgy. Tangub.*
