Gintukod ang Public Assistance Desk para sa mga Overseas Filipino Workers (OFW) sa talatapan sang Public Affairs Office nga nahamtang sa ikaduha nga panalgan sang Kapitolyo Probinsyal.
Suno kay Engr. Jose Maria Amugod, tagpamuno sang Migrant Resource Center (MRC), gintukod ang public assistance desk agud mangin mahapos sa pamilya nga makig-angut sa ila mga himata nga yara sa guwa sang pungsod, ilabi na sa pungsod Israel.
Dugang pa ni Amugod nga yara na sa 231 ang recorded nga OFW nga nakabase sa Israel kag 64 diri ang gikan sa siudad sang Bacolod apang indi pa matumod kun pila ang landbase kag seabase nga mga mamumugon sa nasambit nga pungsod.
Ginpaathag naman sang MRC nga ang ila trabaho amo ang makig-angut sa mga head office, pareho na lamang sa Overseas Workers Welfare Administration (OWWA) kag Department of Migrant Workers (DMW) agud mangin madasig ang pagpakig-angut sang mga pamilya sa Negros Occidental sa ila himata nga naga-obra sa iban nga pungsod.
Suno pa sa tagpamuno sang MRC nga wala pa sang pamilya sang OFW ang nagpalapit sa ila agud mangayo sang bulig angut sa nagaluntad nga giyera sa Israel, magluwas sa pamilya ni Loreta Aleca, nga isa ka caregiver nga nakumpirmar nga nagtaliwan na kahapon nga adlaw.*
