Gin-convict sang korte sa Zamboanga del Norte ang isa ka retired judge sa pagmandu nga patyon ang iya kasubong man nga judge sadtong Mayo 9, 2019.
Ginluthang patay si Judge Reymar Lacaya sang ini ang magasulod na kuntani sa iya salakyan sa parking area sang Bulwagan ng Katarungan sa Liloy, Dipolog.
Sa promulgation sini nga Setyembre 30, 2022, ginpamatbatan ni Zamboanga del Norte Regional Trial Court, Branch 28 Judge Anthony Isaw si anay Judge Oscar Tomarong nga “guilty” bangud siya ang makabig “principal by inducement” sa pagpatay kay Lacaya.
Ginsentensyahan si Tomarong sang pagkapriso sang tubtob 40 ka tuig nga wala sang parole.
Ginmandu-an man si Tomarong nga magbayad sang P9.5 milyones nga moral kag exemplary damages, civil indemnity kag actual damages ukon recovery of the support sa mga manunubli sang judge kung ini ang wala kuntani napatay.
Nahibaluan nga antis pa man ginpatay si Lacaya, nagmandu ang Supreme Court nga magpatigayon sang judicial audit sa RTC-28 nga anay ginadumalahan ni Tomarong.
Ginsaylo si Lacaya sa RTC-28 kung diin ginpang-revoke sini ang mga mandu kag resolusyon nga gin-isyu ni Tomarong sa mga drug cases nga wala nag-agi sa insakto nga bail proceedings.
“While a Judge is viewed as a visible personification of law and justice, it does not make him/her superior, untouchable, or invincible. In the eyes of the law, all are equal…. This Court is bound to apply the law to the fullest extent unmindful of Judge Tomarong’s previous attachment with this Court as its former presiding judge. Let Justice be done though the Heavens fall,” suno sa desisyon sang Korte.*
