Nadulaan gid sang kabuhi ang isa ka retired public school teacher matapos ginluthang sa National Highway, Barangay Haguimit, La Carlota City mga alas 7:00 sang gab-e, Mayo 12.
Ginkilala ang biktima kay Irvi Ramos, 64 anyos kag nagapuyo sa 1st Street sa amo man nga Barangay.
Sa interview kay P/Lt. Col. Jonel Guadalupe, hepe sang La Carlota PNP, si Ramos ang nagalakat halin sa tindahan upod ang iya hinablos sang hinali nalang ini ginluthang sang maka pila ka beses sang wala pa makilal-an nga suspetsado.
Luwas naman sa katalagman ang hinablos sang biktima matapos nakalikaw sa insidente.
Dugang pa ni Guadalupe nga nakaangkon sang igo si Ramos sa iya butkon, kag iban pa nga bahin sang iya nga lawas.
Si Ramos ang may asawa kag may duwa ka kabataan.
Nag-request naman ang pamilya nga ipaidalom sa autopsy ang bangkay sang biktima.
Padayon pa sa karon ang imbestigasyon sang La Carlota PNP sa motibo sang krimen kag identity sang suspetsado.
