Nagdugang sa mga bugal sang banwa sang E.B. Magalona ang 23-anyos nga boksidor matapos madinalag-on nga nadepensahan ang Asian Boxing Federation (ABF) bantamweight title sa Bangkok, Thailand sang Mayo 25, 2023.
Ginlutos ni Herlan Sixto Gomez, 23-anyos nga residente sang Brgy. Madalag sa nasambit nga banwa, ang Thai nga si Jakpan Sangtong sa ikaduha nga round pinaagi sa technical knockout (TKO).
Ginapalab-ot ni Gomez ang iya pagpasalamat kay Mayor Marvin Malacon kag sa mga Saraviahanon para sa pagsuporta sa iya.
Antes nangin kampeon sa kontinente, nagdaug si Gomez sang apat ka gold medals sa Governor Alfredo Marañon Jr. Open Boxing Championship sang 2014, sa BAYS Center sa siudad sang Bacolod sang 2015, sa siudad sang Cadiz sang 2016, kag sa siudad sang La Carlota sang 2017.
Nangin two-time champion pa si Gomez sa PSC-Pacquiao Boxing Cup sang 2018.
Nagdaug man ini sang duha ka silver medals sa Palarong Pambansa sang 2018 kag 2019.
Ikatatlo pa nangin kampeon si Gomez sa Area III Athletic Meet.
Congratulations, Herlan! Bugal ka sang Negros!
