Tubtob karon, pilit nga ginapangita ni Senator Panfilo Lacson ang sabat sa iya nga pamangkot kun ano ang anting-anting ukon lumay nga uyat ni Health Secretary Francisco Duque III rason nga indi ini mapahalin sa puwesto ni Presidente Rodrigo Duterte.
Ginpahayag ni Lacson nga madamo ang kumbinsido nga dapat na nga bayluhan si Duque kag 14 man ka senador magluwas sa iya ang nagsiling nga dapat na magbuya sa puwesto ang tiglikom.
Dugang pa sini, madamo man sa mga tawo nga nakapalibot kay Duque ang indi man bilib sa iya mangin sa medical community.
Suno sa senador, ang kapaslawan ni Duque nga ipatuman ang maayo nga contact-tracing sa mga pasahero sang is aka eroplano sa Wuhan, China kun sa diin sakay ang una nga duha ka kaso sang COVID-19 sa Pilipinas ang dako na nga kapalpakan.
Ginpalala pa ini ang pagpangbasol ni Duque sa iban nga ahensya sang gobyerno sa diin ini ang nag-umpisa sang lubid sang mga kapalpakan sang tiglikom.
