Nadakpan sa port sang San Carlos ang suspek nga si Elmar Alvarez Gemida, 24-anyos las 8:00 kagab-e, Lunes, Oktobre 17.
Si Elmar ang suspek sa pagpatay sa public school teacher nga si Jhun Leo Pañares, 33-anyos.
Nakuha kay Elmar ang motor sang biktima nga Yamaha MIO, cellphone kag wallet nga may unod P10,000.
Nahibaluan nga nagpatigayon sang ‘hot pursuit operation’ ang Naga Police Station sa koordinasyon sang San Carlos City Police Station kag Calatrava Police Station.
Base sa interview sang Radyo Bandera kay PLTCOL Jesus Mesahon Jr., hepe sang San Carlos City Police Station nga nagtawag sa ila ang Naga City Police Station kag ginpahibalo nga taga banwa sang Calatrava ang suspek nga nagpatay sa maestro sa Naga City, Cebu.
Nahibaluan nga sang Sabado sang aga ginpatay sang suspek ang biktima kag naghingagaw pauli ang suspek sa banwa sang Calatrava dala ang motor sang maestro.
Dugang pa ni Mesahon nga nagbulig ang live-in partner sang suspek sa Naga Police sa diin, nagpasugat ang live-in sa pantalan sang San Carlos sa suspek kag didto na ini nadakpan.
Base naman sa imbestigasyon sang Naga Police nga si Gemida kag Pañares ang amigohay kag ulihi nakit-an sa CCTV nga naga-angkasanay sa motor sa 7/11 sang Naga, Cebu kag nagpadulong sa eskwelahan kung sa diin nagatudlo si Pañares.
Si Panares ang kilala bilang maayo nga manunudlo kag naka-schedule pa kuntani nga magpadulong sa Germany nga kabahin sang robotics team sang Naga City para mag-partisipar sa World Robotics Olympiad.
