Warning: rape, sensitive content
CADIZ CITY, NEGROS OCCIDENTAL – Ginakabig na nga suspect ang tapasero nga una nga gintumod bilang ‘person of interest’ sa pagpatay sa 16-anyos nga dalaga nga ginsulod sa sako kag gintapok sa suba sa Brgy. Cabahug sa siudad sang Cadiz.
Suno kay PLtCol. Gil John Despi, hepe sang Cadiz City Police Station, gin-aku sang suspetsado nga si Allan Tingbo, alyas “Paolo”, 48-anyos, ang pagpatay sa biktima.
Dugang pa, may nagtindog man nga saksi sa krimen nga nagatudlo sa suspek nga amo ang responsable sa brutal nga pagpatay sa dalaga.
Base sa pahayag sang suspect, sadtong Biernes sang hapon, Disyembre 9, 2022, naglabay sa iya nga puluy-an ang biktima kag ini ang iya ginbugno kag gintawag.
Pagpalapit sang biktima, gilayon ini nga ginpwersa sang suspek agud himuslan apang nagbato ang dalaga.
Ginbuno sang suspek ang dalaga gamit ang isa ka kitchen knife kag sang madulaan sang kabuhi ang biktima, gilayon niya ini nga ginsulod sa sako kag gintapok sa suba agud itago kuntani ang krimen.
Apang Domingo sang aga, Disyembre 11, nakit-an nga naglutaw ang bangkay sang biktima kag ginkilala ini sang mga himata.
Dugang pa sang suspek, nakursunadahan kag naumol-umol ini sa biktima, rason kun ngaa sang nakakita sang higayon ang suspek, didto sini gintuman ang malain nga handum sa dalaga.
May nakita man nga mga lakra sang dugo sa mga ramay sang saging malapit sa balay ka suspek kag didto man nakita ang mga sako kaangay sang ginsudlan sini sang biktima.
Narekober man ang kutsilyo nga gingamit sa krimen kag ang mga bilin nga buhok nga ginakuum sang mga kamot ka bangkay sang biktima.
Ginahanda na ang kaso nga ‘murder’ batuk sa suspek nga si Tingbo agud masolbar ang kaso kag mahatag ang hustisya sa biktima kag iya pamilya.
