BACOLOD CITY – Patay ang isa ka taxi driver matapos mabungguan sang salakyan nga ginamaneho sang 22-anyos nga estudyante sa dalan Araneta, Brgy. Singcang Airport, siudad sang Bacolod kaina sang kaagahon sini nga Sabado, Enero 7.
Base sa pahayag sang mga saksi, takna las tres sang kaagahon, magatabok pagkatapos mangape sang nabungguan ang taxi driver nga ginkilala kay Leonilo Borbon, 58-anyos, may asawa, kag residente sang Bangga 9, Purok Mabinuligon, Brgy. Sum-ag, sa nasambit nga siudad.
Ginkilala ang drayber sang nakabunggo nga salakyan nga Suzuki Ertiga nga si Miguel Jomari Gialogo, 22-anyos nga estudyante kag residente sang Purok Kasilingan, Brgy. Tangub, sa nasambit man nga siudad.
Nahibaluan nga nag-ungot pa ang ulo sang taxi driver sa windshield sang salakyan apang nagpadayon sa pagmaneho ang estudyante tubtub nakalab-ot sa gasolinahan sa dalan Lacson kun diin nawigit ang biktima.
Base sa pahayag sang estudyante, wala ini makapundo bangud sa kahadlok.
Gindala ang estudyante kag ang salakyan sini sa Bacolod City Police Station 8 para sa nagakaigo nga disposisyon.
