All one na ang score sang TNT Tropang GIGA kag Barangay Ginebra sa Philippine Basketball Association Governor’s Cup Finals best-of-seven match.
Ini matapos ginlutos sang TNT ang Ginebra sa Araneta Coliseum, kagab-i, Miyerkules, Abril 12, 2023.
Sa una nga quarter, ginsugdan ni Rondae Hollis-Jefferson kag Mickey Williams sang TNT ang hampang sa isa ka 3-point shot kag naga-arangka na ang team sang TNT tubtob sa katapusan nga puntos ni Calvin Oftana kag natapos ang quarter sa score nga 27-16.
Sa ika-duha nga quarter, nagtinguha ang team sang Ginebra sa bulig nanday Christian Standhardinger kag Stanley Pringle ang pagpuntos apang nakabawi sanday Roger Pogoy kag Williams sa TNT kag abanse gihapon ang team sa score nga 51-39.
Sa ika-tatlo nga round, “it’s now or never” siling sang Ginebra sang malapit na kuntani malagsan ang score sang TNT sang tatlo ka puntos sa bulig nanday Justin Brownlee, Standhardinger, Pringle kag Jamie Malonzo.
Sa ulihi nga quarter, napaslawan sang Ginebra nga makuha ang reverse win batok TNT kag natapos ang PBA Finals Game 2 sa scores nga 95-82.
Gindala naman ni Hollis-Jefferson ang kadalag-an sang TNT nga may 23 points, 19 rebounds, 9 assists kag 2 steals.
Apang sa pihak nga bahin, ginpangunahan ni Standhardinger ang Ginebra nga may 29 points, 11 rebounds, 2 assists kag 1 steal.
Matabo ang PBA Finals Game 3 buwas nga adlaw, Biyernes, Abril 14.*