NEGROS OCCIDENTAL– Bukas si Vice Governor Jeffrey Ferrer kun magasaylo si Governor Eugenio Jose Lacson sa iya local political party nga United Negros Alliance (UNEGA).
Ini ang reaksyon sang Bise Gobernador sa pamangkot sang media nga nagaplano si Lacson nga magasaylo sa UNEGA matapos sang mga huring-huring nga may nagaplano nga magapapili sa pinakamataas nga posisyon sang probinsya nga mangin kasumpong sini sa pagka Gobernador.
Suno kay VG Ferrer, wala pa siya makabaton sang pormal nga hingyo gikan sa Gobernador apang kun maga-request si Lacson gina abi-abi ini sang Bise Gobernador.
Samtang si UNEGA Secretary General kag Cadiz City Mayor Salvador Escalante Jr. damlag lang nagpahayag nga suportado gihapon sang partido si Governor Lacson.
Madumduman sadtong tuig 2019 sang nagsugod ang alyansa sang duha ka lokal nga partido sa probinsya nga amo ang Love Negros ni Governor Lacson kag UNEGA ni Vice Governor Ferrer.
Samtang sa pihak nga bahin ginpanginwala ni Mayor Albee Benitez ang huring-huring nga magapapili bilang Gobernador sang probinsya ang iya bata nga si Victorias City Mayor Javi Benitez.
Nagaguwa ang espekulasyon nga magapapili si Mayor Javi bilang Gobernador matapos makita ini nga nagalibot sa probinsya.
Apang ginklaro ni Mayor Albee nga kabahin lamang ini sa responsibilidad sang iya bata bilang presidente sang Association of Chief Executives (ACE-Negros).*