Nagaguwa sa ginpatigayon nga imbestigasyon sang Negros Occidental Police Provincial Office nga wala sang police brutality sa ginpatigayon nga drug buy bust operation sang Silay PNP batuk sa kay Glen Comawas sang Prk Basurahan, Pldt Baybay, Brgy. Mambulac tinalikdan nga Marso 23.
Suno kay P/Lt. Abegael Donasco, deputy spokesperson sang NOCPPO, nga may yara man sila sang gina-uyatan nga video kag didto nakita nga nagbato si Comawas sa mga kapulisan kag nag esulta sang pagkapilas sang isa sa mga operatiba.
Dugang pa ni Donasco nga bangud nagbato ang suspetsado, naggamit sang pwersa ang mga kapulisan agud tigayon ini nga ma-aresto kag malikawan nga maglala ang sitwasyon.
Ang NOCPPO ang nagpatigayon sang imbestigasyon matapos nga nagpost sang video ang asawa ni Comawas sa social media nga ginalapak sang pulis ang iya bana apisar nga ini ang nakaposas na samtang ginapa-hapa sa duta.
