Ginluthang sang lolo sang 19-anyos nga suspetsado ang witness sa pagpatay sa 14-anyos nga dalagita sa siudad sang Cadiz.
Nagluntad ang insidente takna alas-9 sang gabi tinalikdan nga Agosto 29, sa Apollo Village, Brgy. Mabini syudad sang Cadiz.
Ang biktima ang ginkilala kay Jorge Calida y Collamar, 46-anyos kag residente sang nasambit nga lugar samtang ang suspek naman ang gin kilala sa kay Hernani Banate Sr., 68-anyos sang amo man nga lugar.
Base sa report gikan sa Cadiz City PNP, samtang yara sa lugar ang biktima nga si Calida hinali na lamang nga nag ulhot ang suspek nga si Banate nga may bitbit nga isa ka improvise shotgun ukon sulpak, kag ginluthang ang biktima.
Igo sa hawak kag tiil ang naangkon sang biktima nga gilayon nga nagpangayo sang bulig, samtang nagpalagyo naman si Banate.
Gilayon naman nga nagpatigayon sang hot pursuit operation ang mga otoridad kag tigayon nga madakapan ang suspetsado.
