1.5 ka tonelada sang bio-waste nakuha sa mga merkado sa Bacolod, pagagamiton sa composting

BACOLOD CITY – Nagdangat sa 1.5 ka tonelada ang bio-waste nga nalakipan sang ‘fruits and vegetables wastes’ nga natipon halin sa Libertad kag Burgos Public Markets sa siudad sang Bacolod kag gindul-ong sa Fresh Start Organic Farm sa siudad sang Silay sang Sabado, Abril 1.

Kabahin ini sang solid waste management program sang administrasyon ni Mayor Albee Benitez nga nagatuyo sang ‘full recyclable program’ para sa tanan nga sahi sang basura.

Igapaidalum ang bio-waste sa ‘windrow composting’ kag igadonar sa ubran farms sa Bacolod.

Nagpakig-angut naman ang siudad sa private companies angut sa recycling program kag dugang pa nga mga plano para madula ang single-use plastics.