Ginlunsar kaina sang aga sini nga Lunes, Abril 3 sa Bacolod City Government Center (BCGC) ang SRA-BBM Sugar Program, kun sa diin mabakal ang kalamay sa presyo nga P70 kada kilo sa 3 ka mga mayor nga merkado sa nasambit nga syudad.
Nahibaluan nga ang presyo sang refined sugar sa siudad ang nagabalor sang P112 kada kilo.
Sa ginpatigayon nga Press Conference ni Mayor Albee Benitez sa Masskara Hall sang BCGC, iya ginpahayag nga sang Pebrero 14 nagsulat ini kay David Alba Sugar Regulatory Administrator nga ilakip ang Bacolod sa SRA-BBM Sugar Program angut sa panawagan ni Agriculture Secretary kag Presidente Ferdinand “Bongbong” Marcos, Jr. sa partisipasyon sa nasambit nga aktibidad.
Pinaagi sa City Cooperative and Livelihood Development Office (CCLDO) sa pagpanguna ni Brenda Burdeos, Department Head, natigayon nga makabaligya sang kalidad kag barato nga kalamay sa mga pumuluyo nga tig-2 ka kilo kada household subong nga adlaw.
Suno pa kay Burdeos nga ang kalamay nga nabaligya ang indi gikan sa mga nakumpiskar sang mga awtoridad, kundi gikan sa Sugar Regulatory Administration (STA), nga himo sang Victorias Milling Company nga refined sugar nga para ikonsumo sang pumuluyo.
Dugang pa sang CCLDO Head nga mamahimo ini nga mabakal sa mga mayor nga merkado sa Bacolod, nga may signage nga SRA-BBM Sugar Program KADIWA kag tubtob 2 ka kilo lamang ang pwede mabakal sang kada tawo asta nga maubos ang suplay sa isa ka adlaw.
Nahibaluan nga ang Bacolod LGU ang naghingyo sang 1,000 ka kilo sang kalamay kada semana para mabaligya sa pumuluyo sang siudad sa consignment basis.
Sa una nga adlaw sang implementasyon sang programa, 500 kilos ang nahatag sang SRA sa Bacolod LGU kag madasig lamang nga naubos ang kalamay kaina sang aga.
Maga-replinish naman ang SRA sa naubos nga kalamay agud mapadayon ang programa sa Bacolod.
Suno pa kay Mayor Benitez, nga indi lang kalamay ang target sang siudad para mabuligan ang mga pumuluyo, kundi sa iban pa nga kinanglanon sang residente agud madula ang problema sa pagkaon pinaagi sang pagpanubo sang mga presyo sang balaklon.*
By Kabanderang Red Salgado
