Apektado ang yara sa 120 ka mga panimalay bangud sa nagluntad nga wildfire kag nagalapta karon sa pila ka mga lugar malapit sa Jongno District sa South Korea.
Suno sa report, nagsugod ang kalayo kahapon, Abril 2 sa Mount Inwang, nga isa ka kilala nga outdoor destination sa Seoul kag madasig ini nga naglapta sa mga kaiping nga lugar bangud sa mainit nga panahon kag mabaskog nga huyop sang hangin.
Wala naman sang may narecord nga napatay ukon nasamaran sa mga ginbakwit nga 239 ka tawo, apang nagdangat naman sa 60 ka mga balay kag imprastraktura ang ginlamon sang kalayo.
Padayon pa ang operasyon sang mga bumbero bangud mabudlay nga matapna ang nasambit nga wildfire kag malapad ang nasakop sini, nga naglab-ot na sa Chungcheong province.
Ginmando na ni South Korean President Yoon Suk Yeol sa mga fire kag forest authorities nga gamiton sa pagresponde ang tanan nga resources agud matapna na ang sunog.*