Ginbawian sang kabuhi ang isa ka bata nga babayi matapos malumos sa Purok Mani, Barangay Montilla Sipalay City, takna las-10:30 sang aga, Domingo, Nobyembre 5.
Base sa impormasyon nga nakuha sang Radyo Bandera, papauli na kuntani sanday Bukay, 11-anyos; Pisay, 10-anyos; kag si Odet, 10-anyos matapos nga naghampang apang naghapit si Pisay sa isa pa ka bakante nga linaw nga ginabuldos para himuon nga relocation ukon subdivision.
Didto na nakadalin-as si Pisay sa isa ka mahumok nga duta tubtob nga nahulog ini sa linaw. Nakita ni Bukay kag Odet nga nagakapa-kapa si Pisay kag nagapangayo sang bulig.
Nagdalagan ang duha ka bata agud mangayo sang bulig apang sa ila nga pagbalik, wala na sang kabuhi kag nagalutaw-lutaw na si Pisay sa linaw.
Gilayon nga gindala ini sa pinakamalapit nga ospital si Pisay agud mahatagan sang medikal nga atensyon apang gindeklarar ini dead-on-the-spot.
Ginsaysay man sang amay ni Pisay nga ang magulang niya man sini nga lalaki ang napatay man bangud nalumos sadtong tinalikdan nga Nobyembre 2020 sa suba sang Malanghug.*
