Patay ang isa ka pedicab driver matapos ginluthang sa Hda Euzkara, Barangay Palampas, siudad sang San Carlos, Negros Occidental, takna las 6:30 sang aga subong nga Lunes, Nobyembre 6, 2023.
Ginkilala ang biktima kay Ronald Santillan Y Alqueza, 39-anyos, may live-in partner kag residente sang Phase 4, Fatima Village, Barangay Rizal sa nasambit nga siudad.
Samtang, ginkilala naman ang suspek kay alyas Jeproks kag residente sang Tinagducan, Barangay Hilaitan, Guihulngan, Negros Oriental.
Base sa inisyal nga imbestigasyon sang San Carlos City Police Station, ginsaysay sang live-in partner sang biktima nga si May Gonzaga Y Castillo, 27-anyos nga nagapahuway sila ni Santillan sang makadali sa nasambit nga lugar.
Sang makaligad ang pila ka minutos, nakita ni Gonzaga nga nagguwa sa tanuman sang tubo si alyas Jeproks nga nakasuksok sang itom nga jacket kag itom nga dilargo.
Hinali na lamang ginluthang ni alyas Jeproks si Santillan kag nagpalagyo matapos ang krimen.
Gindala naman si Santillan sa San Carlos City Hospital agud mahatagan sang medikal nga atensyon apang gindeklarar ini nga dead-on-arrival sang attending physician.
Narekober naman ang isa ka basiyo sang bala sang armas-luthang nga calibre 45 sa ginluntaran sang insidente.
Padayon karon ang ginahimo nga imbestigasyon sang San Carlos CPS para madakpan ang suspek kag mahibaluan ang motibo sini sa pagpangluthang sa bikitma.*
