Turned turtle.
Nagbaliskad ang JMC Troop Carrier nga ginasakyan sang mga kapulisan sa national road sang Purok 1, Barangay Caningay banwa sang Candoni, Negros Occidental, takna las 11 sang aga, Lunes, Nobyembre 28, 2022.
Kabangdanan nga 11 sa 16 ka sakay nga mga pulis ang pilason kag gilayon nga gindala sang rescue personnel sa Candoni Rural Health Unit apang gin-refer sa Holy Mother of Mercy Hospital sa syudad sang Kabankalan.
Ginkilala ang mga pilason nga sanday Pat. Jerome Tolentino, Pat. Joey Bana-ag, Pat. Eric Abela, Pat. Bryan Ambaja, PCPL Mark Jel Salazar, PCPL John Arevalo, PCPL Reggie Tacdoro, PCPL Noriel Vergara, PCPL Kenneth Valiao, Pat. Emam James kag Pat. Jared King Dadivas, sandig sa report nga gin-submit sa Negros Occidental Police Provincial Office.
Sandig sa imbestigasyon, nagapatigayon sang routine road patrol ang 604th company sang Regional Mobile Force Battalion-6 sakay sa JMC troop carrier nga ginpahulam nga salakyan halin sa Sipalay LGU.
Ginamaneho ini ni Patrolman Emam James Apucay.
Halin sa Brgy. Caningay kag magapadulong na kuntani sa Candoni proper ang kapulisan sang naglapaw sila sa dulugon kag nagakurbada nga dalan.
Wala na ma-control ni Apucay ang manibela pabalik sa ila lane kag nagbunggo sa pinakatuo nga bahin sang dalan.
Sandig sa inisyal nga impormasyon, nadulaan sang preno ukon nag-malfunction ang brake ukon preno sang nasambit nga salakyan.*