Bangkay sang palaboy nasapwan sa Calatrava

Nagahigda kag nagabura ang bibig sang isa ka palaboy sang masapwan ini sa Menchaca Park, Barangay Suba, banwa sang Calatrava, Negros Occidental, takna la 1 sang hapon sini nga Lunes, Nobyembre 28.

Ginkilala ang biktima nga si Luisito Dantes, yara sa kwarentahon ang pang-edaron kag residente sang Sitio Pangca sa nasambit nga barangay.

Suno sa Calatrava Police, natukiban sang traffic supervisor nga si Romy Canete ang bangkay sang biktima sa nasambit nga plaza kag gilayon ini gindala sa ospital.

Nahibaluan nga wala sang ‘injury’ ukon pilas ang bangkay kag ginpahayag ni Dr. Kristine Ureta, MD, nga cardiac arrest ang gintunaan sang kamatayon sang biktima.*