SUSPEK NAGLUHOD SA BAGA AGUD MAGPANGAYO PASAYLO SA GINOO ANTES GIN-UTOD ANG ULO SANG ISA KA BABAYE SA SAGAY
Ginpahayag sang 35-anyos nga si Randy Magbanua Maniego nga ginsindihan sini ang uling kag nagluhod agud mangayo sang pasaylo sa Ginoo antes sini patyon kag utdan sang ulo sa isa ka babaye sa Sagay sa isa ka patyo nga sakop sang Sitio Himaya, Barangay Maquiling, syudad sang Sagay, Negros Occidental sadtong Sabado, Nobyembre 26.
Ginkilala ang biktima kay Maya Recodo, 57-anyos, residente sang nasambit nga barangay.
Suno sa interview sang Radyo Bandera sa biktima, pasado las-7 magapanindahan kuntani si Recodo kaupod man ang hinablos nga si Berna kag bilas sang iya hinablos nga si Ritchel sa bahin sang Sitio Himaya sa Barangay Makiling, sang hinali na lamang nga ginhandusan labo sang suspek ang mga biktima gamit ang matalom nga pinuti.
Una nga nalab-an sa kamot ang hinablos nga si Berna, rason nga nautod ang tatlo sini ka tudlo kag maayo na lamang nga nakadalagan kag nakapalagyo ini. Nahulog naman sa talamnan si Ritchel kag nalubong sa lunang.
Apang nabilin kag na-corner ni Maniego sa katubuhan si Recodo nga naga-singgitan kag nagapangayo sang bulig.
Ginlabo ni Maniego sang liog ni Recodo tubtob ma-utod kag maseparar ang iya ulo sa lawas.
Matapos sini, ginbitbit ni Maniego ang ulo ni Recodo kag naglakat padulong sa patyo samtang ginbilin ang lawas sang biktima sa kampo.
Suno pa suspek, tatlo kuntani ang iya patyon kag amo sanday Recodo, ang utod sini nga si Gigi kag ang hinablos sini nga si Berna.
Sandig sa mga nakakilala kag pamilya sang biktima, may ginpaatipan si Recodo kay Maniego nga karabaw sa sulod sang madamo nga tuig.
Apang, naglab-ot sa tion nga ginbaligya ni Recodo ang karbaw bangud sa kapigaduhon kag didto na nangayo si Maniego sang P10,000 para sa madugay nga pag-atipan sini sa sapat, apang P3,000 lamang ang masarangan sang biktima.
Ginhatag ni Recodo ang P2,000 kay Maniego kag gin-utang pa sini ang P1,000 kag bangud diri nagtanom sang kaakig kag dumot ang suspek sa biktima.
Suno kay Maniego, wala ini sang paghinulsol kag gin-ako niya ang iya ginhimo nga pagpatay kay Recodo.
Magapangatubang naman si Maniego sa mga kaso nga murder kag frustrated murder.
