Nag-bleeding kag dyutayan pa ma admit sa ospital ang isa ka menor-de-edad nga babayi matapos gin-alegar ginhimuslan sang ila boardmate takna las 8 kahapon sang aga, Abril 15, 2023 sa isa ka barangay sa syudad sang Bacolod.
Ang 12-anyos nga biktima ang naga-board kaupod sang iya iloy, nga naga-obra sa syudad.
Temporaryo man nga naga rent sang kwarto ang suspek nga gin-alegar taga syudad sang Kabankalan.
Suno sa iloy sang biktima, takna las 7 sang aga Sabado, Abril 15 sang iya ginbilin ang iya bata sa ila kwarto agud mag-duty sa ginaobrahan sini nga isa ka laundry shop.
Sang gulpi na lamang nagkadto ang iya bata kaupod ang iya lolo sa iya gina obrahan nga nagahilibion nga nag sugid nga gin rape ini sang ila ka boardmate.
Sandig sa panaysayon sang iya bata, gintawag ini sang suspek bangud may ipamangkot ini kuntani sa iya ugaling sang ini ang magpalapit na, ginpilit ini nga magsulod sa kwarto sang suspek.
Dugang pa sang bata nga sang ara na ini sa sulod sang kwarto sang suspek, ginbutong ini kag gintayaan sang kutsilyo kag ginpahug nga “Indi manugid kay patyun taka”..Gin-uba sang suspek ang pang idalom nga panapton kag underwear sang biktima kag pilit nga ginpasulod sang suspek ang iya kinatawo sa kinatawo sang bata.
Gilayon nga nagpalagyo ang suspek matapos ang kremin.
Samtang nagahilibion naman ang bata nga nagpanugid sa iya iloy kag gilayon sila nga nagreport sa pulis kag nagpa medical-examination.
Sandig naman sa resulta sang medico-legal nagaguwa nga may “Edema of the Hymen” ukon pilas sa iya hymen ang biktima.
Nagapanawagan naman ang iloy sang biktima sa suspek nga mag sungka kag pangatubangon ang sala nga nahimo batok sa iya bata nga suno sa iya naguba na ang buwas damlag.
Samtang nagapanawagan man ini sa asawa sang suspek nga i-report gilayon sa pulis kag indi pag-i-tolerate ang ginhimo sang iya bana bangud posible madamo pa ini sang mahalitan kag basi sa ulihi ang ila pa bata ang mabiktima sini.
Sa pihak nga bahin, sang ginrungkab sang tag-iya sang balay ang kwarto nga gin-rentahan sang suspek, nakita sa sulod ang mga lulutuon nga sliced nga manok nga ginbayaan na lamang sang suspek.
Nakita man sa sulod sang kwarto ang isa ka “Certificate of Discharge” gikan sa Bureau of Jail Management and Penology (BJMP) – 3 nga nagahatag sang “Probationary” nga kahilwayan sa isa ka persona gikan sa Guagua District Male Dormitory bangud sa kaso nga “Rape” ukon pagpanghimulos.
Sandig sa amo nga certificate, nahimo ang kremin sadtong Hunyo 11, 2021 sa Pampanga kag nakaguwa ang subject sa prisohan sadtong Pebrero 24, 2022.*
