Nagtakop ang isa ka matawhay kag malinong nga hublag-protesta pasado las 4 kagina sang hapon nga ginhiwat sa replika sang NGC sa Bacolod City Public Plaza kadungan sa pagselebrar sang Labor day subong nga adlaw, Mayo 1, 2023.
Sa interview sang Radyo Bandera Bacolod kay Mr. Noli Rosales, Secretary General sang Kilusang Mayo Uno (KMU) – Negros, sandig sa record nagdangat sa 1,270 ang kadamuon sang mga nagpasakop sang rally nga ginalakipan sang mga miembro sang KMU – Negros, United Labor Alliance in Negros (ULAN) kag iban pa nga mga sectoral groups.
Nagapanguna nga ginpanawagan sang grupo amo ang 750 ka pesos “across the board” nga umento sa inadlaw nga sweldo sang mga obrero.
Positibo naman ang reaksiyon ni Rosales sang ginpaguwa nga statement sang Department of Labor and Employment (DOLE) pinaagi kay Labor Secretary Boenvenido Laguesma, nga gina-review na karon sang tagsa ka mga Regional Tripartite Wages and Productivity Board (RTWPB) ang 10 ka mga petisyon para sa saka sweldo sa mga rehiyon sang National Capital Region, Calabarzon, Central Visayas kag Western Visayas.
Suno kay Rosales dako na ini nga bulig para sa mamumugon bisan kun pila lang ang madungang sang ila mga sweldo bangud sa kamahal sang halos tanan nga balaklon kag balayran sa tubig kag kuryente.
By Randy Coronel
