Nagkasa sang buy-bust operation ang utoridad kun sa diin 14 ka sachets sang ginasuspetsuhan shabu nga nagabalor P884,000 ang nakuha sa duha ka mga persona sa Purok Paraiso, Barangay Hilamonan sa syudad sang Kabankalan, Negros Occidental, takna las 11:20 kaina sang aga, Lunes, Agosto 15, 2022.
Gin-aresto sanday Jonalyn Bugalon, alyas “Mommy Jing,” 49-anyos, residente sang nasambit nga barangay, kag si Juanito Artisano Jr., alyas “Jerome,” 54-anyos, kag residente sang Barangay Suay sa syudad sang Himamaylan, Negros Occidental.
Ginakabig High Value Individual si Bugalon, nga isa ka jobless, samtang Street Level Individual naman si Artisano, nga isa ka beautician.
Narekober sa nasambit nga operasyon ang 14 ka sachets sang suspected shabu, isa ka belt bag, isa ka coin purse kag P20,000 nga buy-bust money, nalakip na ang P19,000 nga boodle money.
Ginabulubanta 130 gramos ang nakumpiskar nga iligal nga druga kag ini ang may Standard Drug Price nga P884,000.*
