TALISAY CITY, NEGROS – Patay ang isa ko solterito nga rider samtang pilason naman ang backrider sini matapos aksidente nga makabunggo sa electric post sa Hacienda San Jose, Brgy. Katilingban, siudad sang Talisay.
Ginkilala ang nagtaliwan nga rider sa kay Jonnel Marlou Diaz, 18-anyos samtang ang backrider ang ginkilala naman kay Jonnel Salvador, 38-anyos; magpakaisahay kag lunsay mga residente sang Hacienda Louie sa nasambit nga barangay.
Base sa inisyal nga imbestigasyon sang Talisay City Police Station, nagasakay ang mga biktima sa motorsiklo kag magapauli na kuntani sang magluntad ang aksidente takna las-10:45 sang gab-i sang Sabado, Abril 8.
Samtang nagabyahe sa sidlangan nga direksyon, padulong sa proper sang Brgy. Katilingban, nabunggo ang mga biktima sa poste nga nagresulta sa ila pagkatumba kag pagkaangkon sang mga pilas sa nagkalain-lain nga bahin sang ila lawas.
Gindala ang mga ini sa Talisay City Health Office apang gindeklarar nga dead-on-arrival ang 18-anyos nga drayber nga nakaangkon sang malubha nga injury sa ulo.
