Padayon pa nga ginatatap ang mga indibidwal sa banwa sang Vallehermoso, probinsya sang Negros Oriental, matapos nga nagpositibo sa gastroenteritis.
Kalakip sa mga sintoma amo ang diarrhea, pagsakit sang tiyan,pagsuka kag iban pa.
Suno sa Provincial Health Office (PHO), limitado lamang ang kaso sang gastroenteritis sa Barangay Puan, sa diin ang ginakuhaan sang tubig sang mga residente, kontaminado sang kagaw.
Maka alarma na ang kaso sang impeksyon sa lugar, suno sa PHO.
Ginatingwaan sang lokal nga panguluhan sang probinsya, nga mabuligan ang mga residente nga apektado sang balatian.
Ginabulong na sa ospital ang mga nagbatyag sang sintoma samtang ang iban naman ginatatap sa ila mga puluy-an.
Gintumod sang PHO nga nagpositibo sa amoebiasis ang pila ka mga pasyente nga nagbatyag sang pagsakit sang tiyan kag gin “diarrhea”.
Ginpaidalum pa sa lab test ang mga specimen nga nakuha sa mga pasyente, agud mahibaluan kon positibo ini sa cholera.
Sang tinalikdan nga semana, apat ka mga persona ang nabawian sang kabuhi sa banwa sang Vallehermoso nga nagpositibo sa amoebiasis.
Ginkumpirmar sang PHO nga nadugangan pa gid ang fatalities bangud sang gastroenteritis sa Vallehermoso sa Negros Oriental , gani nagsaka na sa lima ang kadamuon sang nagkalamatay bangud sang nasambit nga kaso.