Ginkumpirmar sang Panaad Festival Committee nga naglab-ot na sa P3,924,668 ang sales sa sulod lamang sang duha ka adlaw humalin nga nagbukas ang ika-27 nga Panaad sa Negros Festival 2023.
Suno sang Festival Committee, ini ang ginalakipan sang sales halin sa Pavilion sang mga Local Government Units, Food Kiosks kag Trade Fair.
Ang kabilugan nga ‘income’ gikan sa mga Pavilion sulod sang duha ka adlaw ang nagdangat sa P2,528,272 samtang ang benta naman gikan sa mga kiosko ang nagdangat sa P1,277,111 kag ang benta sa ginhiwat nga trade fair ang naglab-ot na sa P119,285.
Madamo pa ang nakalinya nga mga aktibidad sa isa ka semana nga selebrasyon sang Panaad sa Negros Festival.
Samtang buwas nga adlaw, Biernes, Abril 21 patigayunon ang coronation night sang Lin-ay sang Negros takna las 7:00 sang gab-i sa Panaad Park and Stadium.
