Patay ang isa ka anay miyembro sang terorista nga grupo nga nag-surrender sa sabak sang gobyerno sang tinalikdan nga tuig matapos ini ginluthang-patay malapit sa plaza sang Sitio Jalandoon, Brgy. Carabalan, syudad sang Himamalyan las 6:00 sang gab-i, Miyerkules, Abril 19,2023.
Ang biktima ginkilala kay Regie Soledad y Gomes, 36-anyos, taga Sitio Cunalom, Brgy. Carabalan, Himamaylan.
Samtang ang mga suspek amo sanday Dandy Salvador y Rafael, 36-anyos, taga Sitio Bulod, Brgy. Carabalan kag Jun Jun Balsimo nga taga Sitio Cantupa, Brgy. Buenavista lunsay taga Himamaylan.
Sanding sa imbestigasyon, namiesta ang biktima sa Sitio Carabalan sang ini ang gintuparan sang duha ka suspek kag ginluthang sa ulo kag sa iya likod.
Gilayon man nga nagpalagyo ang duha ka suspek padulong sa Sitio Tapol, Brgy. Carabalan apang sa karon, nagapabilin sila nga “at-large” kag nagapadayon pa ang hot pursuit operation sang mga kapulisan.
Narekober naman sa lugar sang krimen ang isa ka bala sang caliber 9mm; isa ka fired cartridge case sang caliber 9mm; duha ka bala sang caliber .45; kag isa ka fired cartridge case sang caliber .45.
Sa interview naman sang Radyo Bnadera Bacolod kay PLTCOL Reynante Jomocan, hepe sang Himamaylan City Police Station nga ang biktima ang nag-surrender sang tinalikdan nga tuig sa sabak sang gobyerno kag ginpatinir pa sa ila nga istasyon upod ang iya sini nga mag-iloy para sa ila nga safety.
Nahibaluan nga plano pa kuntani sang DSWD nga patindugan sang kaugalingon nga puluy-an ang biktima kag iya nga mag-iloy kag nakabaton pa sang mga benepisyo.
Apang matapos ang pila ka bulan, naglisensya ang biktima nga magbalik sa ila nga lugar bangud naglaum ini nga “safe” na sila.
Sandig man sa pila ka impormasyon nga ang mga suspek ang anay kaupdanan sang biktima sa bukid.
Pagtimalos ukon kaakig ang ginalantaw motibo sang mga kapulisan sa pagluthang-patay sa biktima.
Na-ilo sang biktima ang iya asawa kag magagmay pa nga mga kabataan.