Ginbawian sang kabuhi ang 20-anyos nga lalaki matapos makabunggo ang iya ginamaneho nga motorsiklo sa pick-up sa Rizal St., National Highway, Barangay Pilar, banwa sang Hinigaran takna las 9:30 sang aga, Martes, Oktubre 3.
Ginkilala ang napatay kag nagamaneho sang Kawasaki Bajaj nga motorsiklo kay Jim Arzaga y Cainoy kag residente sang Sitio Alimango, Barangay San Vicente, banwa sang Hinigaran.
Samtang, ginkilala naman ang nagamaneho sang Izusu Fuego Pick-up kay Rory Divino y Guanco, 62-anyos kag residente sang Barangay Pilar sa nasambit nga banwa.
Base sa report sang Hinigaran Municipal Police Station, nagabiyahe si Arzaga gikan sa nabagatnan padulong sa aminhan nga direksyon sang hinali na lamang nagtabok ang pick-up sa nawala padulong kuntani sa nasidlangan nga direksyon sang dalan.
Bangud diri, nabungguan sang motorsiklo ang pick-up rason nga nakaangkon ang rider sang malala nga injury.
Gindala sa ospital si Arzaga agud mahatagan sang medikal nga atensyon apang ginbawian ini sang kabuhi.
Nakahunong karon sa Hinigaran MPS ang driver sang pick-up para sa nagakaigo nga disposisyon.*