Ginkakas na ang 20 ka mga websites nga nagapalapta sang mga litrato sang child sexual abuse kag exploitation materials sa internet, suno kay Senator Risa Hontiveros.
Ginapahayag ni Hontiveros nga maathag nga napatuman ang Anti-Online Sexual Abuser and Exploitation of Children (OSAEC) Law sa Pilipinas nga iya ginduso sa senado.
Ginhatagan sang National Bureau of Investigation (NBI) ang opisina ni Hontiveros sang mga “links” sang ginkakas na nga websites bangud sang paglapas sa Anti-OSAEC Law.
Ginpahibalo man sang NBI Cybercrime si Hontiveros nga ginhatagan aksyon sang Philippine Long Distance Telephone Company (PLDT) ang ila request nga kakson na ang nasambit nga mga websites.
Suno sa NBI Cybercrime, posible pa nga madugangan ang mga links kag litrato nga pagakakson sa online.
Bangud diri ginpasalamatan ni Hontiveros ang NBI, mga pribado nga sektor kag ang PLDT bangud sa ila madasig nga pagresponde.
“Sa ngayon, naka-block na ang benteng (20) mga website at mga larawang nagpapakalat ng mga child sexual abuse and exploitation materials sa internet. Binigyan din ng NBI ng kopya ang opisina ko ng mga links na inaksyunan nila. Bilang principal author ng batas, this is a very positive development in our fight against OSAEC,” suno kay Hontiveros.
via Philstar
