Nagakaagnas na sang masapwan ang isa ka 21-anyos nga babayi nga graduating architecture student matapos ginhimuslan kag ginpatay sang wala pa makilal-an nga suspek sa iya ginarentahan sini nga apartment sa San Jose, Occidental Mindoro.
Ginkilala ang biktima nga si 21-anyos nga si Eden Villacete, residente sang banwa sang Calintaan kag naga-renta lamang sang apartment sa Brgy. 7, San Jose, Occidental Mindoro, suno sa report sang Pilipino Star Ngayon.
Nahibaluan nga wala nagasabat sa tawag kag text ang biktima rason kun ngaa ginkadtuan ini sang iya mga ginikanan sa iya apartment apang nakibot ang mga ini nga makita nga patay kag nagahublas na ang biktima.
Suno sa Occidental Mindoro Police, nakaangkon ang biktima sang apat ka buno sa iya likod kag narekober ang duha ka patalom nga gingamit sa kremin.
Nadiskubre man nga nadula ang cellphone kag laptop sang biktima rason kun ngaa posible nga pagpangawat ang motibo sa kremin.
Ginpahayg naman ni Police Provincial Director Col. Jun Dexter Danao nga may isa ka person of interest na sila sa kaso sang pagpatay kay Villacete kun sa diin nakita sa CCTV ang isa ka lalaki nga nagalakat malapit sa compound sang apartment sang biktima takna las 3:40 sang kaagahon sadtong nagligad nga Miyerkules.
Nagdihon na man sang Special Investigation Task Group ang Occidental Mindoro Provincial Police para tutukan ang maid-id nga imbestigasyon sa pagpatay kag paghimulos sa 21-anyos nga biktima.*
