TALISAY CITY, NEGROS OCCIDENTAL – Naga-utaw utaw na ang bangkay sang isa ka 22- anyos nga lalaki sang masapwan sa Catabla River sa Purok Sigay, Brgy. Zone 3, siudad sang Talisay.
Ginkilala ang biktima sa kay Jenicito Sevilla, 22-anyos nga residente sang nasambit nga lugar.
Base sa interview sang Radyo Bandera kay Police Master Sergeant Edmundo Jomocan, nasapwan ang bangkay sang biktima takna las singko sang hapon sang Sabado, Marso 25.
Suno sa panaysayon sang amay sang biktima nga si Joemarie, siya mismo ang nakakita sa iya bata nga wala na sang kabuhi kag naga-utaw utaw na lamang sa nasambit nga suba.
Ginpahayag pa sang amay nga naga-suprer sang ‘epilepsy’ ang iya bata kag makapila niya na ini ginsaway nga indi maglangoy sa suba, apang nag-upod ang biktima sa iya mga abyan kag naligo sa suba.
Ginalantaw nga posible nga gin-atake ang biktima sang iya balatian samtang nagapaligo sa suba, rason ngaa nalumos ini.
Ginhingagaw pa dala ang biktima sa Talisay City Health Center apang gindeklarar ini nga ‘dead on arrival’.
