(Hungod nga wala ginhingadlan sang Radyo Bandera ang biktima bangud isa ini ka menor de edad.)
Ginpalayag ni Bacolod Police Station 5 Commander PMaj. Joery Puerto nga pagasakaan na sang kaso nga ‘3 counts of rape’ ang 24-anyos nga lalaki nga nanghimulos sa 15-anyos nga dalagita nga iya lamang nakilala sa social media.
Suno kay Puerto, nakatalana nga ipasaka ang mga kaso batuk sa suspek karon sa hapon subong nga Miyerkules, Agosto 23, 2023.
Madumduman nga lima na ka bulan nagabusong ang biktima matapos ini ginhimuslan sang tatlo ka beses sang suspek.
Sandig sa pagpang-usisa sang Women and Children’s Protection Desk (WCPD), ginpahayag sang biktima nga nakilala niya lamang ang suspetsado sa social media, nangin magbarkadahay sila kag nag grupo-grupo.
Suno sa biktima, natabo ang una nga paghimulos sa iya sadtong bulan sang Pebrero kun sa diin pagkatapos sang pagpraktis sini sang saot, ginsugat siya sang suspek agud maglagaw apang gindala siya sa kapahoan kag didto ginpilit nga ubahan kag ginhimuslan.
Natabo ang ikaduha nga paghimulos sang suspek sa biktima sadtong una nga semana sang Marso, didto gihapon sa kapareho nga lugar kun sa diin ginpahog siya sang suspetsado nga pakahuy-an sa social media kun indi ini magpakita.
Dugang pa ni Puerto, natabo ang ikatatlo nga paghimulos sadtong katapusan nga semana sang Marso didto na sa balay sang suspek sa Barangay Alangilan.
Dugang pa ni Puerto, ‘regular filing’ lamang ang pagahimuon nila nga pagpasaka sang kaso batuk sa suspek bangud ‘at large’ ini sa gihapon.*
