Lima ka bulan na nga nagabusong ang 15-anyos nga dalagita matapos nga ginhimuslan sang isa ka 24-anyos nga lalaki nga iya lamang nakilala sa social media.
Hungod nga wala ginhingadlan ang biktima bangud isa ini ka menor de edad.
Wala lang anay ginpagwa ni Bacolod Police Station 5 Commander PMaj. Joery Puerto ang ngalan sang 24-anyos nga suspek bangud at large pa ini.
Apang suno sang hepe nga gina proseso na nila ang pagpasaka sang kaso nga ‘rape’ batok sang suspek.
Suno kay Puerto, wala gilayon magpanugid sa iya mga ginikanan ang biktima bangud sa kahadlok.
Apang sini lang nga semana bangud nagdako na ang iya tiyan kag nabal-an na sang iya ginikanan ang iya sitwasyon, gilayon ini nga gin-updan sa Police Station 5 agud magreklamo.
Sandig sa pagpang-usisa sang Women and Children’s Protection Desk (WCPD) ginpahayag sang biktima nga nakilala niya lamang ang suspetsado sa social media, nangin magbarkadahay sila kag nag grupo-grupo.
Suno sa biktima natabo ang una nga paghimulos sa iya sadtong bulan sang Pebrero kon sa diin pagkatapos sang pagpraktis sini sang saot, ginsugat siya sang suspek agud maglagaw apang gindala siya sa kapahoan kag didto ginpilit nga ubahan kag ginhimoslan.
Natabo ang ikaduha nga pagtimulos sang suspek sa biktima sadtong una nga semana sang Marso, didto gihapon sa kapareho nga lugar kun sa diin ginpahog siya sang suspetsado nga pakahuy-an sa social media kun indi ini magpakita.
Dugang pa ni Puerto, natabo ang ikatatlo nga paghimulos sadtong katapusan nga semana sang Marso didto na sa balay sang suspek sa Barangay Alangilan.
Desidido naman nga magapasaka sang kaso ang biktima batok sa suspek.
Ginahulat nalang sang Police Station 5 ang resulta sang medico-legal kag Birth Certificate sang biktima agud ma establisyar nga menor de edad ini agud mapasaka ang kaso nga rape pinaagi sang “regular filing”.
Paalintun ni Puerto sa mga pamatan-on nga indi gilayon magsalig sa mga nakilala lamang sa social media agud indi mabiktima.
Sa mga ginikanan naman suno kay Puerto, dapat bantayan ang ila kabataan nga menor de edad ilabi na kun babayi, hibaluon kun ano ang mga aktibidad sini kag kun sin- o ang iya gina-updan.*
