Dead-on-arrival sa ospital ang manugbaligya sang mais sa nagluntad nga pagbunggu-anay sang tricycle kag Ceres bus kaina sang hapon sa Osmeña Avenue, National Highway, Hacienda Ideal, Barangay 13, Victorias City, Negros Occidental, sini nga Sabado, Agosto 20, 2023.
Ginkilala ang tricycle driver kay Elf Sanipa, 25-anyos, may asawa, residente sang Barangay 10, Bacolod City.
Samtang ang driver sang Ceres amo si Lemuel Fajardo, 49-anyos, may asawa, residente sang Polopangyan, Barangay Bug-ang, banwa sang Toboso.
Pilason naman ang kaupod ni Sanipa nga si Jenalyn Navarro, residente sang Purok Angela Gonzaga, Barangay Vista Alegre, Bacolod City.
Base sa imbestigasyon sang kapulisan, yara ang tricycle sa outer lane samtang ang Ceres bus naman ang yara sa inner lane kag pareho nga nagapadulong sa norte nga direksyon.
Nahibalu-an nga naglapaw sa lane ang tricycle rason nga nabunggu-an ini sang Ceres bus.
Matapos sang aksidente, gilayon nga gindala ang mga biktima sa Victorias City Emergency Clinic apang gindeklarar si Sanipa nga dead-on-arrival.
Ginsaylo naman si Navarro sa Corazon Locsin Montelibano Memorial Hospital sa Bacolod City.
Nakahunong sa Victorias City Police Station si Fajardo.
Apang ginahulat pa ang desisyon sang pamilya sang biktima kun magapasaka ini sang kaso.*
