Ginkumpirmar ni Jail Senior Superintendent Gilbert Peremne, assistant regional director sang Bureau of Jail Management and Penology Region-6 nga may yara sang 25 ka mga inmates nga “newly committed” sa BJMP Negros Occidental Isolation Facility nga yara sa Barangay Handumanan, Bacolod City, ang nagpositibo sa coronavirus disease (COVID-19).
Isa sa tikang agud mapamatukan ang paglapta sang COVID-19 sa mga jail facilities sa Negros Occidental amo ang pagbutang sang mga persons deprived of liberty sa BJMP Negros Occidental Isolation Facility, agud i-swab kag i-quarantine.
Ini agud mahibaluan kon may yara sang positibo agud ini ang ma-isolate kag mabulong, antes sila liwat ang i-reswab. Kinahanglan nga sila ang negatibo sa virus antes ini sila pagasayluhon sa BJMP facility.
Suno kay Peremne ang 25 ka inmates ang nag-gikan sa nagkalain-lain nga units sang Philippine National Police sa ciudad sang San Carlos, Kabankalan, Victorias sa Negros Occidental kag Bacolod.
Gindugang pa ni Peremne nga ang 25 nga nagpositibo ang kabahin sa 214 nga newly-committed sang PNP matapos ini sila ang gin pang swab bilang kabahin sang tikang sang BJMP agud mapasiguro nga wala sang COVID-19 infected nga makasulod sa mga correctional facility sang ila ahensiya.
Dugang pa sini nga yara na sa karon sa BJMP Ligtas Covid-19 Center sa ciudad sang Talisay ang 25 ka mga inmates matapos nagguwa ang ila swab test result sang nagligad nga Abril 14.
Wala man sang dapat ikabalaka suno pa kay Peremne bangud wala man matigayon nga mapasulod sa mga jail facilities ang mga inmates kag ini sila ang naka quarantine na sa karon.*
