BAYAWAN, NEGROS ORIENTAL – Patay ang isa ka lalaki matapos ini ginbuno sa dughan sa Purok 4, Brgy. Pagatban, siudad sang Bayawan, Negros Oriental kagab-i sang Sabado, Abril 22.
Base sa imbestigasyon sang Bayawan City Police Station, una na nga nagbinaisay ang mga imbolbado sang tinalikdan nga semana angut sa utang sang suspetsado.
Takna las otso kagab-i, samtang nagalabay ang biktima nga ginkilala kay Janel Mahilum, 26-anyos nga residente sang nasambit nga barangay, hinali ini ginbuno sang suspek nga ginkilala naman kay Carlo Paderna, 21-anyos nga residente sang Purok 4, Brgy. Minaba, sa nasambit man nga siudad.
Nakaangkon ang biktima sang pilas sa nawala nga bahin sang dughan.
Gindala pa ini sa ospital apang gindeklarar nga dead-on-arrival.
Pagkalipas sang pila ka oras, takna las-10:45 sang gab-i, boluntaryo nga nagsungka ang suspek sa barangay.
Gilayon ini nga gin-turnover sa kapulisan para sa nagakaigo nga disposisyon kag agud atubangon ang kaso.
