PONTEVEDRA – Arestado ang isa ka 40-anyos nga high value individual (HVI) sa ginpatigayon nga buy-bust operation sa Purok 2, Brgy. Recreo, banwa sang Pontevedra takna la-1:30 sini lamang nga hapon sang Domingo, Abril 23.
Ginkilala ang suspetsado sa kay Mark Gayoba, alyas Bonbon, 40-anyos, may asawa, wala sang trabaho, residente sang Purok Carmen, Brgy. 3 Poblacion, sa nasambit nga banwa, kag ginakabig nga HVI sang kapulisan.
Base sa report sang Pontevedra Municipal Police Station, nakumpiskar sa suspek ang 12 ka pakete sang ginasuspetsuhan shabu nga ginabulubanta nagabug-at sang lima ka gramos kag nagabalor sang P34,000.
Nagapang-atubang ang suspek sang mga kaso sa paglapas sa Sections 5 kag 11 sang Republic Act 9165 ukon ang “Comprehensive Dangerous Drugs Act.”
