Patay ang 39 tanan ka mga persona matapos nga nagluntad ang sunog sa isa ka detention center sa pungsod Mexico, malapit sa US border.
Suno sa mga otoridad, mismo ang mga “migrants” nga ginapriso sa lugar amo ang nagtuga sang kalayo, bilang protesta, matapos mahibaluan nga e “deport” sila sang Mexican Immigration.
Naglapta ang kalayo sa National Migration Institute (NMI) facility sa Ciudad Juarez, antis ang tungang gab-i.
Sa nasambit nga lugar nagatiner ang 68 ka mga “adult” nga lunsay lalaki, nga nagikan sa Central kag South America.
Suno kay President Andres Manuel Lopez Obrador sang Mexico, ginbutang sang mga migrants ang banig sa pwertahan sang pasilidad kag ginsindihan.
Naglapta ang kalayo sa shelter kag wala na makasalbar ang mga migrants.
Magluwas sa 39 ka mga persona nga nagkalamatay, may 29 pa gid ka mga persona nga nasamaran sa insidente.*
