Liwat nga nagpaandam ang Department of Social Welfare and Development sa publiko sa mga scammers.
Ini may angut sa nagapakuno-kuno nga DSWD employee matapos makabaton sang impormasyon ang ahensya halin sa pamilya sang biktima nga ginkuha sang scammer ang P50,000 nga kwarta nga para kuntani sa operasyon sang conjoined twins sang pamilya.
Suno sa DSWD, nagpakig-angut ang scammer sa amay sang kapid nga residente sang Tagum City, Davao del Norte matapos nagpost ang amay sa social media sang balati-an sang iya anak.
Nag-promisa naman ang scammer nga pagasabton sang DSWD ang kinahanglan sang kapid kag nagpangayo sang one-time-pin agud ma-access ang online mobile wallet sang amay kun sa diin nakatago ang donasyon.
Ulihi na lamang nahibalu-an sang amay nga na-scam na ini sang nagpakuno-kuno nga DSWD employee.
Pagakatapos sang insidente, naghatag naman sang P5,000 ang DSWD bilang bulig pinansyal sa pamilya sa idalom sang Assistance to Individuals in Crisis Situations.
Padayon naman ang koordinasyon sang pamilya sa DSWD may angut sa operasyon sang kapid sa ospital.
Paandam sang ahensya nga kun may mga problema, magkadto lang sa pinakamalapit nga DSWD Field ukon Satellite Office agud mahatagan sang bulig.*
